Sinxeleza

Composición clara e limpa, con poucos elementos, que permite ver ben o importante.

No exemplo destacan só o rostro, as mans e o colar da muller, fundíndose o resto do seu corpo con fondo negro.

Complexidade

Composición con moitos elementos, detalles e formas, que enche a imaxe e pode transmitir movemento ou confusión.

Na imaxe pódense observar moitos edificios de cores variadas, un sinfín de cables debuxando liñas diagonais e mesmo vehículos aparcados nunha das beiras da estrada.

Predominancia de liñas horizontais

Cando na imaxe destacan liñas que van de lado a lado (de esquerda a dereita). Transmiten tranquilidade, calma e estabilidade.

As liñas non teñen por que ser liñas literais, senón que tamén poden ser unha sucesión de elementos similares dispostos seguindo esa dirección horizontal e que levan o voso cerebro a visualizalos como unha "liña". Na fotografía as arbores colocadas en liña ou as flores agrupadas por cores suxiren horizontalidade.

Predominancia de liñas verticais

Cando destacan liñas que van de arriba a abaixo. Dan sensación de forza, altura e firmeza.

As palmeiras da fotografía co seu tronco esvelto fan que os vosos ollos percorran a fotografía de abaixo a arriba, e marcan a verticalidade que caracteriza a imaxe, mesmo non sendo unha foto en sentido vertical.

Predominancia de liñas diagonais

Cando predominan liñas inclinadas. Transmiten dinamismo, movemento e tensión, facendo a imaxe máis activa e expresiva.

As liñas diagonais que debuxan os banzos da escaleira, remarcadas polas sombras contrastadas, fan que percibades a muller da imaxe subindo cun movemento veloz.

Predominancia de liñas orgánicas ou sinuosas

Uso de liñas curvas e suaves, inspiradas na natureza. Dan sensación de movemento, naturalidade e dinamismo.

Para percibir este tipo de liñas non só podedes recorrer a fotografar elementos naturais como ondas mariñas, dunas desérticas, pólas de árbores, etc., senón tamén elementos artificiais como o edificio da imaxe, que poden suxerir esas mesmas sensacións.

Simetría

Cando os dous lados dunha imaxe son iguais ou moi parecidos. Transmite orde, tranquilidade e harmonía.

Na fotografía podedes ver a dúas irmás xemelgas que pola súa similitude física, por ir vestidas igual e pola súa colocación, insinúan unha simetría case perfecta.

Equilibrio

Cando os elementos da imaxe están colocados sen que unha parte pese máis que outra, é dicir, que ningunha vos chame máis a atención cás demais. Pode ser simétrico ou asimétrico.

No exemplo que se mostra podedes observar un equilibrio asimétrico, que adoita ser máis difícil de conseguir que mediante a simetría. Aquí a construción da esquerda máis iluminada podería chamar máis a atención, mais a noria da dereita, pola forma circular non tan habitual, faille competencia. Tamén a colocación de ámbolos elementos, un abaixo e outro arriba, fai que se equilibren entre si.

Regra dos terzos

Consiste en dividir a imaxe en 9 partes iguais con dúas liñas horizontais e dúas verticais. Os puntos onde se cruzan son ideais para colocar o elemento ou elementos máis importantes.

Na imaxe podedes ver neses puntos de interese tanto o home como o grupo de paxaros. Por outra banda, que un deles estea arriba e outro abaixo, fai que a fotografía quede máis equilibrada.

Contraste

Diferenza entre elementos da imaxe (debida a cor, tamaño, forma, luz...) para destacar o máis importante.

Na famosa fotografía do exemplo, o grupo de homes destaca por verse nítidos en contraste co fondo de edificios borroso. Tamén por ser a parte máis escura destacando sobre o entorno, e por último, por conformar unha liña diagonal moi marcada.

Harmonía

Cando os elementos da imaxe combinan ben entre si, creando unha sensación agradable e equilibrada.

Aínda sendo diferentes todos os edificios que vedes na imaxe, comparten características similares: cores rechamantes, xanelas alongadas e, por como está tomada a fotografía, liñas diagonais moi marcadas.

Efecto difuminado ou bokeh

Consiste en enfocar unha parte da imaxe e deixar o fondo borroso. Serve para destacar o suxeito principal.

No exemplo podedes apreciar como a parte máis próxima está nítida en contraste co fondo difuminado. Deste xeito o voso ollo destaca a linealidade das vías do tranvía como o elemento clave da imaxe.

Efecto enmarcado

Colocar o elemento principal dentro dun marco natural ou artificial (portas, xanelas, árbores...) para guiar a mirada cara el.

Na fotografía do exemplo, o oco da xanela fai que a vosa mirada se dirixa cara ao que hai no seu interior: dúas mozas conversando animadamente nun bar.